காயம் காரணமாக இங்கிலாந்துக்கு எதிரான அடுத்த இரண்டு மான்செஸ்டர், ஜூலை 21, 2025: இங்கிலாந்துக்கு எதிரான டெஸ்ட் தொடரில் இந்திய அணிக்கு மேலும் ஒரு பெரும் பின்னடைவாக, இளம் ஆல்-ரவுண்டர் நித்திஷ் குமார் ரெட்டி காயம் காரணமாக எஞ்சியுள்ள இரண்டு டெஸ்ட் போட்டிகளில் இருந்தும் விலகியுள்ளார். மான்செஸ்டரில் நடைபெறவுள்ள நான்காவது டெஸ்ட் போட்டிக்கு முன்னதாக, பயிற்சியின் போது அவருக்கு ஏற்பட்ட முழங்கால் காயம் தான் இந்த விலகலுக்கு காரணம் என்று கூறப்படுகிறது.
நேற்று (ஜூலை 20) ஜிம் பயிற்சியின் போது நித்திஷ் குமார் ரெட்டிக்கு முழங்காலில் காயம் ஏற்பட்டது. உடனடியாக அவருக்கு ஸ்கேன் எடுக்கப்பட்டது. ஸ்கேன் முடிவுகளில், அவரது தசைநாரில் (ligament) கணிசமான சேதம் ஏற்பட்டுள்ளது தெரியவந்துள்ளது. இதனால் அவர் முழு தொடரில் இருந்தும் விலகுவார் என எதிர்பார்க்கப்படுகிறது. இது குறித்து அணி நிர்வாகத்திற்கு நெருக்கமான வட்டாரங்கள் தெரிவித்துள்ளதாவது, “ஆம், நித்திஷ் குமார் ரெட்டிக்கு காயம் ஏற்பட்டுள்ளது.
இப்போதைய நிலையில், மான்செஸ்டர் மற்றும் ஓவல் மைதானங்களில் நடைபெறவுள்ள கடைசி இரண்டு டெஸ்ட் போட்டிகளில் அவர் பங்கேற்பது சாத்தியமில்லை” என்று தெரிவித்தன. இந்தியா ஏற்கனவே 1-2 என்ற கணக்கில் தொடரில் பின்தங்கியுள்ள நிலையில், நித்திஷ் குமார் ரெட்டியின் விலகல் அணிக்கு பெரும் கவலையை ஏற்படுத்தியுள்ளது. முன்னதாக, வேகப்பந்து வீச்சாளர்களான ஆகாஷ் தீப் மற்றும் அர்ஷ்தீப் சிங் ஆகியோரும் காயம் காரணமாக மான்செஸ்டர் டெஸ்ட் போட்டியில் பங்கேற்பது கேள்விக்குறியாகியுள்ளது.
நித்திஷ் குமார் ரெட்டி இந்த தொடரில் இந்தியாவின் இரண்டாவது மற்றும் மூன்றாவது டெஸ்ட் போட்டிகளில் விளையாடினார். லார்ட்ஸில் நடைபெற்ற மூன்றாவது டெஸ்டில், அவர் பேட்டிங்கில் 43 ரன்கள் எடுத்ததுடன், பந்துவீச்சில் 3 முக்கிய விக்கெட்டுகளையும் வீழ்த்தி தாக்கத்தை ஏற்படுத்தினார். நித்திஷ் குமார் ரெட்டியின் விலகலைத் தொடர்ந்து, ஆல்-ரவுண்டர் ஷர்துல் தாக்கூர் ஆடும் லெவனில் இடம் பெற அதிக வாய்ப்புள்ளது.
