மான்செஸ்டர்: இங்கிலாந்துக்கு எதிரான 5 போட்டிகள் கொண்ட டெஸ்ட் தொடரின் நான்காவது போட்டி இன்று மான்செஸ்டரில் உள்ள ஓல்ட் டிராஃபோர்ட் மைதானத்தில் தொடங்கியது. இந்தப் போட்டியில் இங்கிலாந்து கேப்டன் பென் ஸ்டோக்ஸ் டாஸ் வென்று முதலில் பந்துவீச முடிவு செய்தார். தொடரில் 2-1 என்ற கணக்கில் முன்னிலை வகிக்கும் இங்கிலாந்து, இந்த ஆட்டத்தில் வெற்றி பெற்று தொடரை வெல்லும் முனைப்பில் உள்ளது.
டாஸை இழந்த இந்திய அணி கேப்டன் சுப்மன் கில், முதலில் பேட்டிங் செய்வதில் தனக்கு எந்த ஆட்சேபணையும் இல்லை என்று தெரிவித்தார். இந்திய அணியில் மூன்று முக்கிய மாற்றங்கள் செய்யப்பட்டுள்ளன. முச்சதம் அடித்த வீரர் கருண் நாயருக்குப் பதிலாக சாய் சுதர்சன் அணியில் சேர்க்கப்பட்டுள்ளார். காயம் காரணமாக அவதிப்பட்டு வந்த ஆகாஷ் தீப்புக்கு பதிலாக அன்ஷுல் கம்போஜ் தனது டெஸ்ட் அறிமுகத்தைப் பெறுகிறார். மேலும், நிதிஷ் குமார் ரெட்டிக்குப் பதிலாக ஷர்துல் தாக்கூர் அணியில் இடம்பிடித்துள்ளார்.
இங்கிலாந்து அணியில் ஒரு மாற்றம் மட்டுமே செய்யப்பட்டுள்ளது. காயம் காரணமாக ஷோயிப் பஷீருக்குப் பதிலாக லியாம் டாவ்சன் அணியில் சேர்க்கப்பட்டுள்ளார்.
மான்செஸ்டரில் நிலவும் மேகமூட்டமான வானிலை மற்றும் பிட்சின் தன்மை காரணமாகவே ஸ்டோக்ஸ் பந்துவீச்சைத் தேர்ந்தெடுத்ததாகக் கூறப்படுகிறது. இந்த ஆட்டம் இந்திய அணிக்கு மிக முக்கியமானது. தொடரை சமன் செய்ய இந்தியா நிச்சயம் வெற்றி பெற்றாக வேண்டிய கட்டாயத்தில் உள்ளது.
