ராமேஸ்வரம்: கச்சத்தீவு அருகே மீன்பிடித்துக் கொண்டிருந்த ராமநாதபுரம் மாவட்டம் பாம்பன் பகுதியைச் சேர்ந்த 10 மீனவர்கள் உட்பட 14 தமிழ்நாடு மீனவர்களை இலங்கை கடற்படை அராஜகமாக சிறைபிடித்துச் சென்றது, அப்பகுதியில் பெரும் பரபரப்பை ஏற்படுத்தியுள்ளது.
ராமநாதபுரம் மாவட்டம், பாம்பன் பகுதியைச் சேர்ந்த 10 மீனவர்கள் நேற்று (ஆகஸ்ட் 5) இரண்டு விசைப்படகுகளில் மீன்பிடிக்க கடலுக்குச் சென்றனர். அதேபோல, புதுக்கோட்டை மாவட்டம், ஜெகதாபட்டினத்தைச் சேர்ந்த 4 மீனவர்களும் ஒரு விசைப்படகில் கடலுக்குச் சென்றுள்ளனர். இவர்கள் அனைவரும் கச்சத்தீவு அருகே மீன்பிடித்துக் கொண்டிருந்தனர்.
அப்போது, அந்தப் பகுதிக்கு வந்த இலங்கை கடற்படையினர், மீனவர்களை சுற்றி வளைத்து, எச்சரிக்கை விடுத்தனர். பின்னர், எல்லை தாண்டி வந்ததாகக் கூறி, 14 மீனவர்களையும் அவர்களின் 3 விசைப்படகுகளையும் சிறைபிடித்துச் சென்றனர்.
மீனவர்களை இலங்கை கடற்படையினர், யாழ்ப்பாணம் கடற்படை முகாமிற்கு அழைத்துச் சென்று விசாரணை நடத்தி வருகின்றனர். இலங்கை கடற்படையின் இந்தச் செயல், தமிழக மீனவர்கள் மற்றும் அவர்களின் குடும்பத்தினர் மத்தியில் பெரும் அதிர்ச்சியையும், அச்சத்தையும் ஏற்படுத்தியுள்ளது.
இந்தச் சம்பவம் குறித்து பேசிய தமிழக மீனவ சங்கத் தலைவர்கள், “இலங்கை கடற்படையின் அராஜகம் தொடர்ந்து அதிகரித்து வருகிறது. இது இந்திய அரசின் அலட்சியப் போக்கையே காட்டுகிறது. உடனடியாக மத்திய, மாநில அரசுகள் தலையிட்டு, கைது செய்யப்பட்ட 14 மீனவர்களையும் அவர்களின் படகுகளையும் விடுவிக்க நடவடிக்கை எடுக்க வேண்டும்” என்று கோரிக்கை விடுத்தனர்.
மீனவர்களின் கைது குறித்த தகவல் அறிந்ததும், ராமேஸ்வரம் மற்றும் புதுக்கோட்டை பகுதிகளில் மீனவர்கள் தங்கள் போராட்டத்தைத் தொடங்கினர். அவர்களின் குடும்பத்தினரும் மத்திய, மாநில அரசுகள் தகுந்த நடவடிக்கை எடுக்கும் என எதிர்பார்த்துள்ளனர்.
