மதுரை: அதிமுகவின் மூத்த தலைவரும் முன்னாள் அமைச்சருமான செங்கோட்டையன் குறித்து மற்றொரு முன்னாள் அமைச்சரான செல்லூர் கே. ராஜு இன்று (டிசம்பர் 6) கடுமையான விமர்சனங்களை முன்வைத்துள்ளார். ‘உண்மையான அதிமுககாரன்’ யார் என்பது குறித்து அவர் அளித்த பேட்டி, அரசியல் வட்டாரத்தில் பரபரப்பை ஏற்படுத்தியுள்ளது.
மதுரையில் செய்தியாளர்களைச் சந்தித்த செல்லூர் ராஜு, கட்சியின் நிலைப்பாட்டில் இருந்து விலகிச் செயல்படும் நபர்களைக் கடுமையாகச் சாடினார். அவர் பேசுகையில், “எந்தக் கட்சியும் வேண்டாம், எந்தப் பதவியும் வேண்டாம். எம்.ஜி.ஆர். உருவாக்கிய அதிமுகவில் கடைக்கோடி தொண்டனாகக் கூட இருப்பேன் என்று உண்மையாகவும் உறுதியாகவும் இருப்பவன் தான் உண்மையான அதிமுககாரன்,” என்று குறிப்பிட்டார்.
இந்தக் கருத்து மறைமுகமாக செங்கோட்டையனைக் குறிப்பதாக அரசியல் நோக்கர்கள் கருதுகின்றனர். சமீப காலமாக, செங்கோட்டையன் கட்சித் தலைமைக்கு எதிராகச் செயல்படுவதாகச் சில தகவல்கள் வெளியான நிலையில், அவரது செயல்பாடுகளைக் குறிக்கும் வகையிலேயே செல்லூர் ராஜுவின் இந்தப் பேச்சு அமைந்திருக்கிறது.
அதிமுகவில் ஒற்றைத் தலைமை விவகாரத்துக்குப் பிறகு, பல மூத்த தலைவர்களுக்கு இடையே கருத்து வேறுபாடுகள் நீடித்து வருகின்றன. செல்லூர் ராஜுவின் இந்தக் கடுமையான விமர்சனம், அதிமுகவில் நிலவும் உட்கட்சி மோதல்களை மீண்டும் ஒருமுறை வெளிச்சத்துக்குக் கொண்டு வந்துள்ளது. செங்கோட்டையன் இதற்கு என்ன பதிலளிக்கப் போகிறார் என்ற எதிர்பார்ப்பு எழுந்துள்ளது.
