டாக்கா: வங்கதேசத்தில் ஷேக் ஹசீனாவின் ஆட்சி வீழ்த்தப்பட்ட பிறகு அமைக்கப்பட்ட முகம்மது யூனுஸ் தலைமையிலான இடைக்கால அரசு, தற்போது மிகப்பெரிய அரசியல் நெருக்கடியைச் சந்தித்து வருகிறது. 2024 எழுச்சிப் போராட்டத்தின் நாயகர்களில் ஒருவரான ஷரீப் ஒஸ்மான் ஹாதி கொல்லப்பட்டதைத் தொடர்ந்து, அந்த நாட்டின் சட்டம் ஒழுங்கு முற்றிலும் சீர்குலைந்துள்ளது.
தந்தையைத் தொடர்ந்து மகனும் இலக்கா? கடந்த டிசம்பர் 12-ம் தேதி டாக்காவின் பிஜய்நகர் பகுதியில் ரிக்சாவில் சென்று கொண்டிருந்தபோது, முகமூடி அணிந்த மர்ம நபர்களால் ஹாதி தலையில் சுடப்பட்டார். சிங்கப்பூரில் சிகிச்சை பலனின்றி அவர் உயிரிழந்த நிலையில், அவரது சகோதரர் ஷரீப் ஓமர் பின் ஹாதி யூனுஸ் அரசு மீது கடுமையான குற்றச்சாட்டுகளை முன்வைத்துள்ளார்.
உடைத்துப் பேசிய சகோதரர்: டாக்காவின் ஷாபாக் பகுதியில் நடைபெற்ற ‘தியாகிகள் உறுதிமொழி’ (Martyrdom Oath) நிகழ்ச்சியில் கலந்துகொண்டு பேசிய ஓமர் ஹாதி, “யூனுஸ் அரசுதான் எனது சகோதரரைக் கொன்றது. ஆறு நாட்கள் ஆகியும் கொலையாளிகளைப் பிடிக்க இந்த அரசு எந்த நடவடிக்கையும் எடுக்கவில்லை. தேர்தலை அரசியலாக்கவே இந்தத் திட்டமிட்ட கொலை நடந்துள்ளது” எனப் பகிரங்கமாகப் போர்க்கொடி தூக்கியுள்ளார்.
பற்றி எரியும் வங்கதேசம்: ஹாதியின் மரணத்தைத் தொடர்ந்து வங்கதேசம் முழுவதும் வன்முறை வெடித்துள்ளது:
ஊடகங்கள் மீது தாக்குதல்: இந்தியாவின் ஏஜெண்டுகள் எனக் கூறி ‘ப்ரோதோம் ஆலோ’ மற்றும் ‘டெய்லி ஸ்டார்’ ஆகிய பத்திரிகை அலுவலகங்கள் தீயிட்டு கொளுத்தப்பட்டன.
சிறுபான்மையினர் பாதிப்பு: ஹாதியின் மரணத்திற்குப் பழிவாங்கத் துடிக்கும் கும்பல்கள், மைமன்சிங் பகுதியில் தீபு சந்திர தாஸ் என்ற இந்து இளைஞரை அடித்துக் கொன்று எரிக்கப்பட்ட சம்பவம் உலக நாடுகளை அதிர்ச்சியில் ஆழ்த்தியுள்ளது.
அரசியல் ஸ்திரமின்மை: 2026 பிப்ரவரி 12-ம் தேதி பொதுத் தேர்தல் நடைபெறவுள்ள நிலையில், மற்றொரு மாணவர் தலைவர் மொடாப் சிக்தர் மீதும் சமீபத்தில் துப்பாக்கிச் சூடு நடத்தப்பட்டுள்ளது.
யூனுஸின் விளக்கம்: இந்தக் குற்றச்சாட்டுகளை மறுத்துள்ள முகம்மது யூனுஸ், “புதிய வங்கதேசத்தில் வன்முறைக்கு இடமில்லை” என்றும், கொலையாளிகள் யாராக இருந்தாலும் தண்டிக்கப்படுவார்கள் என்றும் உறுதியளித்துள்ளார். இருப்பினும், தீவிரவாதக் குழுக்களைக் கட்டுப்படுத்தத் தவறியதாக அவர் மீது சர்வதேச அளவில் விமர்சனங்கள் எழுந்துள்ளன.
