இங்கிலாந்து அணியின் சரிவு குறித்துப் பேசிய முன்னாள் கேப்டன் அலஸ்டைர் குக், இந்திய அணியையும் கடுமையாகச் சாடியுள்ளார். இந்திய அணியின் தற்போதைய பலத்தை அவர் மிகக் குறைவாக மதிப்பிட்டுப் பேசியது இந்திய ரசிகர்களைக் கொதிப்படையச் செய்துள்ளது.
அலஸ்டைர் குக் சொன்ன அந்த ‘ஷாக்’ கமெண்ட்: மெல்போர்ன் டெஸ்ட் போட்டியின் போது பேசிய குக், “சமீபத்தில் நடந்த இந்தியாவுக்கு எதிரான டெஸ்ட் தொடரை (2-2) இங்கிலாந்து டிரா செய்தது. ஆனால், அந்த இந்திய அணியைப் பெரிய அணி என்று யாரும் நினைத்துவிட வேண்டாம். உண்மையில் அந்த இந்திய அணி ஒன்றும் அவ்வளவு சிறந்த அணி கிடையாது (That Indian side wasn’t great). அப்படிப்பட்ட ஒரு அணியிடம் கூட இங்கிலாந்து திணறியது தான் கவலைக்குரிய விஷயம்” என்று பேசினார்.
ஏன் இந்த விமர்சனம்? சுப்மன் கில் தலைமையிலான இளம் இந்திய அணி இங்கிலாந்திற்குச் சென்றபோது, அனுபவம் குறைந்த அணி என்று சொல்லப்பட்டது. இருந்தபோதிலும், இங்கிலாந்தை அதன் சொந்த மண்ணிலேயே இந்தியா சமன் செய்தது. இதைச் சுட்டிக்காட்டிய குக், “அந்தத் தொடருக்குப் பிறகு இந்திய அணி தென் ஆப்பிரிக்காவிலும், நியூசிலாந்திடமும் அடி வாங்கியது. இதிலிருந்தே தெரிகிறது இந்தியா இப்போது பலமான நிலையில் இல்லை என்று. அப்படிப்பட்ட ஒரு அணியை கூட இங்கிலாந்தால் வீழ்த்த முடியாமல் போனது தான், ஆஷஸ் தொடரில் நாம் இப்படித் தோற்பதற்குக் காரணம்” என்று விளக்கினார்.
பாஸ்பால் ஆட்டத்திற்கு விழுந்த அடி: இங்கிலாந்து கடைபிடித்து வரும் ‘பாஸ்பால்’ (Bazball) அதிரடி ஆட்டம், வலுவான அணிகளுக்கு எதிராக எடுபடவில்லை என்பதையே குக் மறைமுகமாகச் சுட்டிக்காட்டியுள்ளார். “நாங்கள் ஏதோ பெரிய அணிகளுடன் விளையாடிச் சாதித்துவிட்டதாக ஒரு பிம்பத்தை உருவாக்கினோம். ஆனால், உண்மையில் எதிரணியின் பலவீனங்கள் தான் நம்மைத் தப்பிக்க வைத்தன” என்று அவர் உண்மையை உடைத்துப் பேசியுள்ளார்.
