மதுராந்தகம் (ஜனவரி 23, 2026): மதுராந்தகத்தில் இன்று நடைபெற்ற தேசிய ஜனநாயகக் கூட்டணியின் (NDA) பிரம்மாண்ட அறிமுகக் கூட்டத்தில், நீண்ட இடைவெளிக்குப் பிறகு எடப்பாடி பழனிசாமியுடன் ஒரே மேடையில் அமமுக பொதுச்செயலாளர் டிடிவி தினகரன் பங்கேற்றார். அப்போது அவர் தனது கூட்டணி முடிவிற்கான காரணங்களை அடுக்கினார்.
மக்களின் பாதுகாப்பு கேள்விக்குறி: “இன்று தமிழகத்தில் சட்டம் – ஒழுங்கு சந்தி சிரிக்கிறது. பெண்களுக்குப் பாதுகாப்பு இல்லை, எங்கு பார்த்தாலும் கொலை, கொள்ளை என மக்கள் அச்சத்தில் வாழ்கிறார்கள். இந்த நிலையை மாற்ற ஒரு பலமான கூட்டணி தேவைப்பட்டது.”
போதைப்பொருள் மாநிலம்: “தமிழகம் இன்று ‘கஞ்சா மாடல்’ ஆட்சியாக மாறிவிட்டது. பள்ளி, கல்லூரிகளுக்கு அருகே போதைப்பொருள் தங்கு தடையின்றி கிடைக்கிறது. இளைய சமுதாயத்தைச் சீரழிக்கும் இந்த திமுக ஆட்சியை வீட்டுக்கு அனுப்ப வேண்டும் என்பதே எங்களது முதல் இலக்கு.”
ஏன் இந்த கூட்டணி?: “பழைய கசப்பான சம்பவங்களை நான் மறந்துவிட்டேன். எனக்கும் எடப்பாடி பழனிசாமிக்கும் இடையே இருந்த ‘பங்காளிச் சண்டை’யை விட, தமிழக மக்களின் நலன் எனக்குப் பெரிதாகத் தெரிந்தது. திமுக என்ற தீய சக்தியை ஒழிக்க, அம்மாவின் தொண்டர்கள் அனைவரும் ஒன்றாக நிற்க வேண்டியது காலத்தின் கட்டாயம். அதனால்தான் ஈபிஎஸ் தலைமையிலான இந்த மெகா கூட்டணியில் இணைந்துள்ளேன்.”
அம்மாவின் ஆட்சி: “மீண்டும் தமிழகத்தில் ஜெயலலிதாவின் பொற்கால ஆட்சியை எற்படுத்தவும், தமிழகத்தை ஊழல் பிடியில் இருந்து மீட்கவும் நாங்கள் கைகோர்த்துள்ளோம்” எனத் உணர்ச்சிவசமாகப் பேசினார்.
அரசியல் முக்கியத்துவம்: கடந்த சில ஆண்டுகளாக இபிஎஸ்-ஐக் கடுமையாக விமர்சித்து வந்த டிடிவி, தற்போது “பெரிய இலக்கிற்காகச் சமரசம் செய்துகொள்வதில் தவறில்லை” எனப் பேசியிருப்பது, தென் தமிழகத்தில் அதிமுக – அமமுக வாக்குகள் சிதறாமல் இருக்க வழிவகை செய்யும் என அரசியல் விமர்சகர்கள் கருதுகின்றனர்.
