மத்திய கிழக்கில் அமெரிக்கா மற்றும் ஈரான் இடையிலான போர் இன்று (மார்ச் 14, 2026) ஒரு மிக முக்கியமான மற்றும் ஆபத்தான கட்டத்தை எட்டியுள்ளது. ஈரானின் 90 சதவீத எண்ணெய் ஏற்றுமதி நடைபெறும் மிக முக்கியமான கார்க் தீவு (Kharg Island) மீது அமெரிக்கப் படைகள் நேற்று நள்ளிரவு மிகப்பெரிய வான்வழித் தாக்குதலை நடத்தின. இந்தத் தாக்குதல் குறித்துப் பதிவிட்டுள்ள அமெரிக்க அதிபர் டொனால்ட் டிரம்ப், “ஈரானின் ‘மகுடம்’ போன்ற கார்க் தீவின் ராணுவத் தளங்கள் முற்றிலும் அழிக்கப்பட்டுவிட்டன. மனிதாபிமான அடிப்படையில் இப்போதைக்கு எண்ணெய் கட்டமைப்புகளைச் சேதப்படுத்தவில்லை; ஆனால் ஈரான் வாலை ஆட்டினால் அதுவும் தப்பாது” என எச்சரித்துள்ளார்.
இதற்குப் பதிலடியாக, ஈரானின் ஆயுதப் படைகளின் ஒருங்கிணைந்த கட்டளை மையம் (Khatam al-Anbiya) இன்று விடுத்துள்ள அறிக்கையில், “அமெரிக்கா விளையாட்டைத் தொடங்கிவிட்டது. இனி மத்திய கிழக்கில் உள்ள அமெரிக்கத் தொடர்புடைய அனைத்து எண்ணெய் வயல்கள், எரிசக்தி கட்டமைப்புகள் மற்றும் அமெரிக்க நிறுவனங்களுடன் ஒத்துழைக்கும் எண்ணெய் நிறுவனங்களின் தளங்கள் எங்களின் ஏவுகணைகளுக்கு இலக்காகும். அவை அனைத்தும் வெறும் சாம்பல் குவியலாக மாற்றப்படும்” என ஈரான் கடும் மிரட்டல் விடுத்துள்ளது.
ஈரானின் இந்த எச்சரிக்கையைத் தொடர்ந்து, சவுதி அரேபியா, ஐக்கிய அரபு அமீரகம் மற்றும் கத்தார் போன்ற நாடுகளில் உள்ள அமெரிக்கத் தளங்கள் மற்றும் எண்ணெய் சுத்திகரிப்பு நிலையங்களில் உச்சகட்டப் பாதுகாப்பு பலப்படுத்தப்பட்டுள்ளது. ஏற்கனவே ஹார்முஸ் ஜலசந்தியை ஈரான் மூடியுள்ளதால், உலகச் சந்தையில் கச்சா எண்ணெய் விலை ஒரு பேரல் 120 டாலரைத் தாண்டியுள்ளது. இந்தப் போர் எரிசக்தி யுத்தமாக மாறினால், அது உலகப் பொருளாதாரத்தையே நிலைகுலையச் செய்யும் என நிபுணர்கள் அஞ்சுகின்றனர்.
