கடந்த சில நாட்களாகத் தங்கம் மற்றும் வெள்ளி விலையில் நிலவி வந்த கடும் ஏற்ற இறக்கங்கள், இன்று (மார்ச் 23, 2026) ஒரு மிகப்பெரிய சரிவில் முடிந்துள்ளன. சென்னையில் ஆபரணத் தங்கம் ஒரு சவரனுக்கு யாரும் எதிர்பாராத விதமாக ரூ.5,360 குறைந்து, ரூ.1,03,600-க்கு விற்பனை செய்யப்படுகிறது.
அதேபோல், ஒரு கிராம் ஆபரணத் தங்கம் (22 கேரட்) ரூ.670 வரை சரிந்து, ரூ.12,950-க்கு விற்பனை ஆகிறது. கடந்த சில வாரங்களுக்கு முன்பு ஒரு சவரன் ரூ.1.25 லட்சத்தைத் தொட்டு அச்சுறுத்திய நிலையில், இன்று ரூ.1.03 லட்சத்திற்கு வந்துள்ளது நடுத்தர வர்க்கத்தினருக்குப் பெரும் நிம்மதியை அளித்துள்ளது.
வெள்ளி விலையிலும் வரலாறு காணாத வீழ்ச்சி ஏற்பட்டுள்ளது. நேற்று ஒரு கிலோ வெள்ளி ரூ.2.50 லட்சமாக இருந்த நிலையில், இன்று கிலோவுக்கு அதிரடியாக ரூ.15,000 குறைந்து, ரூ.2,35,000-க்கு விற்பனை செய்யப்படுகிறது. ஒரு கிராம் வெள்ளி ரூ.15 குறைந்து ரூ.235-க்கு விற்பனை ஆகிறது. சர்வதேச அளவில் வளைகுடாப் போர்ச் சூழலில் ஏற்பட்டுள்ள சில மாற்றங்கள் மற்றும் முதலீட்டாளர்கள் பங்குகள் பக்கம் திரும்பியதே இந்தத் திடீர் சரிவுக்குக் காரணமாகக் கூறப்படுகிறது.
அமெரிக்க டாலரின் மதிப்பு வலுவடைந்ததும் தங்கத்தின் மீதான மோகத்தைச் சற்றே குறைத்துள்ளது. வரும் நாட்களில் இன்னும் விலை குறைய வாய்ப்பிருப்பதாக ஒரு தரப்பினர் கூறினாலும், திருமண முகூர்த்த நாட்களுக்காகக் காத்திருப்பவர்கள் இந்த விலைக் குறைவைப் பயன்படுத்தி இப்போதே நகைக்கடைகளை நோக்கிப் படையெடுத்து வருகின்றனர்.
