அமெரிக்க அதிபர் டொனால்ட் ட்ரம்ப், ஈரானுக்கு எதிராக நடைபெற்று வரும் போர் குறித்து நேற்று (ஏப்ரல் 1, 2026) நாட்டு மக்களுக்கு உரையாற்றினார். அப்போது, “ஈரானின் கடற்படை, விமானப்படை மற்றும் ஏவுகணை உற்பத்தித் தளங்கள் ஏற்கனவே சிதைக்கப்பட்டுவிட்டன. குறிப்பாக, அவர்களது அணுசக்தித் திறனை முடக்குவது என்ற எங்களது இலக்கு எட்டப்பட்டுவிட்டது” எனத் தெரிவித்தார். இருப்பினும், அடுத்த இரண்டு அல்லது மூன்று வாரங்களுக்கு ஈரானை அமெரிக்கப் படைகள் ‘மிகக் கடுமையாக’ தாக்கும் என்றும், அந்த நாட்டை மீண்டும் ‘கற்காலத்திற்கே’ (Stone Age) கொண்டு செல்வோம் என்றும் அவர் ஆவேசமாக எச்சரித்தார். ஈரானிடம் தற்காத்துக் கொள்ள இப்போது எதுவுமில்லை என்றும், அனைத்து ராணுவ வாய்ப்புகளும் அமெரிக்காவிடமே உள்ளதாகவும் அவர் குறிப்பிட்டார்.
இந்த 2-3 வார காலப்பகுதியில், ஈரான் அமெரிக்காவின் நிபந்தனைகளுக்கு உடன்படாவிட்டால், அங்குள்ள ஒவ்வொரு மின் உற்பத்தி நிலையங்களும் (Power Plants) தரைமட்டமாக்கப்படும் என ட்ரம்ப் சூசகமாகத் தெரிவித்தார். பிப்ரவரி 28-ல் தொடங்கிய இந்த ராணுவ நடவடிக்கையின் முக்கிய நோக்கங்கள் நிறைவேறி வருவதால், ஏப்ரல் மாத இறுதிக்குள் அமெரிக்கப் படைகள் அங்கிருந்து வெளியேறத் தொடங்கும் என எதிர்பார்க்கப்படுகிறது.
ஹார்முஸ் ஜலசந்தியைத் திறப்பது மற்றும் புதிய அணுசக்தி ஒப்பந்தம் குறித்துப் பேச்சுவார்த்தைகள் நடந்து வந்தாலும், ட்ரம்ப்பின் இந்த ‘2-3 வார’ மிரட்டல் ஈரானின் புதிய தலைமைக்கு ஒரு மிகப்பெரிய அழுத்தத்தைக் கொடுத்துள்ளது. ட்ரம்ப்பின் இந்தப் பேச்சால் சர்வதேசச் சந்தையில் கச்சா எண்ணெய் விலை மீண்டும் உயரத் தொடங்கியுள்ளதுடன், இஸ்ரேல் மற்றும் ஈரானுக்கு இடையிலான பதற்றமும் உச்சத்தை எட்டியுள்ளது.
