முட்டாள்தனமாக இருக்கிறது விவாகரத்து வதந்திகளுக்கு முற்றுப்புள்ளி வைத்த அபிஷேக் பச்சன் ஐஸ்வர்யா ராய் குறித்து உருக்கம்
மும்பை: பாலிவுட்டின் ‘ஸ்டார் கப்பிள்’ ஆன அபிஷேக் பச்சன் மற்றும் ஐஸ்வர்யா ராய் இடையே விவாகரத்து நடக்கப்போவதாகக் கடந்த சில மாதங்களாக இணையதளங்களில் காட்டுத்தீயாக ஒரு செய்தி பரவி வந்தது. பல நிகழ்ச்சிகளுக்கு ஐஸ்வர்யா ராய் தனித்தே வந்ததும், அபிஷேக் பச்சன் தனது திருமண மோதிரத்தை கழற்றி வைத்திருந்ததும் இந்தச் சந்தேகத்தை வலுப்படுத்தியது.
இந்நிலையில், இந்த சர்ச்சைகளுக்குப் பதிலடி கொடுக்கும் விதமாக நடிகர் அபிஷேக் பச்சன் ஓபனாகப் பேசியுள்ளார்.
யார் முடிவு செய்வது? தனியார் நேர்காணல் ஒன்றில் பேசிய அவர், “நானும் ஐஸ்வர்யா ராயும் திருமணம் செய்து கொள்வதற்கு முன்பே, எங்களுக்கு எப்போது திருமணம் நடக்கும் என்பதை ஊடகங்களும் சில நபர்களும் அவர்களாகவே முடிவு செய்தார்கள். இப்போது, நாங்கள் எப்போது விவாகரத்து செய்வோம் என்பதையும் அவர்களாகவே முடிவு செய்கிறார்கள். இது உண்மையிலேயே முட்டாள்தனமானது” என்றார்.
எங்களுக்கு உண்மை தெரியும்: தொடர்ந்து பேசிய அவர், “எங்கள் இருவருக்கும் இடையே இருக்கும் உண்மை நிலை என்ன என்பது எங்களுக்குத் தெரியும். வதந்திகளைப் பரப்புபவர்கள் எதை வேண்டுமானாலும் சொல்லிக் கொள்ளட்டும். அதில் எனக்குக் கவலை இல்லை. ஒரு பொது மனிதனாக (Public Figure) இருப்பதில் இதையெல்லாம் எதிர்கொண்டுதான் ஆக வேண்டும்” எனத் தனது திருமண மோதிரத்தைக் காட்டி வதந்திகளுக்கு முற்றுப்புள்ளி வைத்தார்.
பின்னணி: சமீபத்தில் நடந்த அம்பானி வீட்டுத் திருமணத்தின் போது ஐஸ்வர்யா ராய் தனது மகளுடன் தனியாக வந்ததும், பச்சன் குடும்பத்தினர் மொத்தமாக வந்ததும் பெரிய விவாதமானது. ஆனால், அபிஷேக் இப்போது கொடுத்திருக்கும் இந்த விளக்கம், அவர்கள் இன்னும் ஒன்றாகத்தான் இருக்கிறார்கள் என்பதை உறுதி செய்துள்ளது.
