சென்னை: இயக்குநர் மாரி செல்வராஜ் இயக்கத்தில் நடிகர் துருவ் விக்ரம் கதாநாயகனாக நடித்துள்ள ‘பைசன் (காளமாடன்)’ திரைப்படம் தீபாவளியை முன்னிட்டு அக்டோபர் 17-ம் தேதி வெளியாகவிருக்கிறது. கபடி விளையாட்டை மையமாகக் கொண்ட இப்படத்தின் விளம்பர நிகழ்ச்சியில் பேசிய துருவ் விக்ரம், தனது முந்தைய படங்களை விட இந்தத் திரைப்படம்தான் தனது உண்மையான முதல் படம் என்று உருக்கமாகத் தெரிவித்தார்.
துருவ் விக்ரம் பேசியது என்ன?
சென்னையில் நடைபெற்ற ‘பைசன்’ திரைப்படத்தின் பிரமோஷன் நிகழ்ச்சியில் கலந்து கொண்ட துருவ் விக்ரம், ரசிகர்களின் எதிர்பார்ப்பை அதிகரிக்கும் வகையில் பேசினார்.
அவர் கூறியதாவது:
“என் பெயர் துருவ். நான் இதுவரை இரண்டு படங்களில் (‘ஆதித்ய வர்மா’, ‘மகான்’) நடித்துள்ளேன். நீங்கள் அந்த இரண்டு படங்களைப் பார்க்கவில்லை என்றாலும் எனக்கு எந்தப் பிரச்னையும் இல்லை. ஆனால், ‘பைசன்’ திரைப்படத்தை நீங்கள் கட்டாயம் பார்க்க வேண்டும். இதைத்தான் நான் என்னுடைய உண்மையான முதல் படமாகப் பார்க்கிறேன். நீங்களும் அதேபோல பார்ப்பீர்கள் என்று நம்புகிறேன்.”
“இந்தக் கதைக்காக ஒட்டுமொத்தப் படக்குழுவும் கடுமையாக உழைத்துள்ளது. நான் இந்தப் படத்திற்காக என்னுடைய 100 சதவீத உழைப்பையும் ஒத்துழைப்பையும் கொடுத்திருக்கிறேன். குறிப்பாக, இயக்குநர் மாரி செல்வராஜ் சார் இறங்கி சம்பவம் செய்திருக்கிறார்.“
“குடும்பத்தினருடனோ, நண்பர்களுடனோ அல்லது காதலருடனோ நீங்கள் திரையரங்குக்கு வரலாம். ஆனால், இந்தப் படத்தைக் கண்டிப்பாக அனைவரும் பார்க்க வேண்டும்,” என்று அவர் ரசிகர்களுக்கு வேண்டுகோள் விடுத்தார்.
படத்தின் பின்னணி:
தென்மாவட்ட இளைஞர்களின் வாழ்வியலையும், கபடி வீரர் மணத்தி கணேசனின் உண்மை வாழ்க்கைக் கதையையும் மையமாக வைத்து இயக்குநர் மாரி செல்வராஜ் இப்படத்தை உருவாக்கியுள்ளார். பா. இரஞ்சித்தின் ‘நீலம் புரொடக்ஷன்ஸ்’ மற்றும் ‘அப்ளாஸ் எண்டர்டெயின்மென்ட்’ நிறுவனங்கள் இணைந்து தயாரித்துள்ள இந்தத் திரைப்படத்தில் துருவ் விக்ரமுடன் அனுபமா பரமேஸ்வரன், ரெஜிஷா விஜயன், பசுபதி, கலையரசன் உள்ளிட்ட பலர் முக்கிய கதாபாத்திரங்களில் நடித்துள்ளனர்.
