வாக்குறுதியை நிறைவேற்றுங்கள் சென்னையில் போராடிய 650 ஆசிரியர்கள் மீது அதிரடி வழக்கு 12 நாட்களாக ஓயாத இடைநிலை ஆசிரியர்கள்
சென்னை: சென்னை நுங்கம்பாக்கத்தில் உள்ள டிபிஐ (DPI) வளாகத்தை முற்றுகையிட்டு, 10 நாட்களுக்கும் மேலாகத் தொடர் போராட்டத்தில் ஈடுபட்டு வரும் இடைநிலை பதிவு மூப்பு ஆசிரியர்கள் மீது காவல்துறை அதிரடியாக வழக்குப் பதிவு செய்துள்ளது.
வழக்குப்பதிவு பின்னணி: “சம வேலைக்கு சம ஊதியம்” என்ற ஒற்றை இலக்கை முன்னிறுத்தி, இடைநிலை ஆசிரியர்கள் சென்னை எழும்பூர் மற்றும் நுங்கம்பாக்கம் பகுதிகளில் போராட்டங்களை முன்னெடுத்து வருகின்றனர். நேற்று டிபிஐ வளாகத்தை முற்றுகையிட முயன்றபோது, அனுமதியின்றி கூடுதல் மற்றும் பொது அமைதிக்குக் குந்தகம் விளைவித்தல் உள்ளிட்ட பிரிவுகளின் கீழ் 650 ஆசிரியர்கள் மீது நுங்கம்பாக்கம் போலீசார் வழக்குப் பதிவு செய்துள்ளனர்.
ஏன் இந்தப் போராட்டம்?
-
2009-க்கு முன்: நியமிக்கப்பட்ட ஆசிரியர்களின் அடிப்படை ஊதியம் ரூ. 8,370.
-
2009-க்கு பின்: நியமிக்கப்பட்ட ஆசிரியர்களின் அடிப்படை ஊதியம் ரூ. 5,200.
-
முரண்பாடு: ஒரே தகுதி, ஒரே வேலை இருந்தும் மாதச் சம்பளத்தில் சுமார் ரூ. 20,000 முதல் ரூ. 30,000 வரை வித்தியாசம் இருப்பதாக ஆசிரியர்கள் குற்றம் சாட்டுகின்றனர்.
-
தேர்தல் வாக்குறுதி: 2021 தேர்தலின் போது திமுக கொடுத்த வாக்குறுதி எண் 311-ஐ நிறைவேற்ற வேண்டும் என்பதே இவர்களின் பிரதான கோரிக்கை.
அமைச்சர் பதில்: இது குறித்துப் பள்ளிக் கல்வித்துறை அமைச்சர் அன்பில் மகேஷ் பொய்யாமொழி கூறுகையில், “ஆசிரியர்களின் கோரிக்கையை அரசு உணர்ந்துள்ளது. நிதித்துறையுடன் ஆலோசித்து விரைவில் நல்ல முடிவு எடுக்கப்படும்” எனத் தெரிவித்துள்ளார். இருப்பினும், அரசாணை வெளியாகும் வரை போராட்டத்தைக் கைவிடப் போவதில்லை என ஆசிரியர்கள் உறுதியாக உள்ளனர்.
