சென்னையில் இருந்து திருத்தணி நோக்கிச் சென்ற மின்சார இரயிலில், பொதுமக்களை அச்சுறுத்தும் வகையில் ரீல்ஸ் எடுத்துக் கொண்டிருந்த சிறுவர்களைத் தட்டிக்கேட்ட வடமாநில இளைஞர் மீது கொலைவெறித் தாக்குதல் நடத்தப்பட்டுள்ளது. இந்தச் சம்பவத்தின் வீடியோ காட்சிகள் சமூக வலைதளங்களில் வெளியாகி பார்ப்போரை உறைய வைத்துள்ளது.
சம்பவம் என்ன? நேற்று மாலை சென்னை – திருத்தணி இரயிலில் 17 வயது மதிக்கத்தக்க 4 சிறுவர்கள் கையில் பெரிய கத்தியை வைத்துக்கொண்டு, சக பயணிகளை அச்சுறுத்தும் வகையில் ‘ரீல்ஸ்’ எடுத்துக் கொண்டிருந்தனர். இதைப் பார்த்த அங்கிருந்த சுராஜ் என்ற வடமாநில இளைஞர், பொதுமக்களுக்கு இடையூறு செய்ய வேண்டாம் என அச்சிறுவர்களைத் தடுத்துள்ளார்.
கொடூரத் தாக்குதல்: தன்னைத் தட்டிக்கேட்டதால் ஆத்திரமடைந்த அந்த 4 சிறுவர்களும், தாங்கள் மறைத்து வைத்திருந்த அரிவாளை எடுத்துச் சுராஜை சரமாரியாக வெட்டினர். இரயில் பெட்டிக்குள் பயணிகள் அலறியடித்து ஓடிய நிலையிலும், எதற்கும் அஞ்சாமல் அந்தச் சிறுவர்கள் இளைஞரைத் தாக்கியுள்ளனர். இதில் சுராஜின் தலை மற்றும் கைகளில் பலத்த காயம் ஏற்பட்டு ரத்த வெள்ளத்தில் சரிந்தார்.
காவல்துறை நடவடிக்கை: இந்தக் கொடூரச் சம்பவம் தொடர்பாக இரயில்வே போலீசார் வழக்குப் பதிவு செய்து, தலைமறைவாக இருந்த 4 சிறுவர்களையும் கைது செய்துள்ளனர். அவர்கள் அனைவரும் 17 வயதிற்கு உட்பட்டவர்கள் என்பதால் அவர்கள் மீது சிறார் சட்டத்தின் கீழ் நடவடிக்கை எடுக்கப்பட்டு வருகிறது. காயமடைந்த சுராஜ் தற்போது மருத்துவமனையில் தீவிர சிகிச்சை பெற்று வருகிறார்.
சமூக வலைதள மோகம்: சமீபகாலமாக ‘லை்க்ஸ்’ மற்றும் ‘வியூஸ்’காகப் பொது இடங்களில் ஆயுதங்களைக் காட்டி ரீல்ஸ் எடுக்கும் கலாச்சாரம் அதிகரித்து வருவது சமூக ஆர்வலர்களிடையே கவலையை ஏற்படுத்தியுள்ளது. தட்டிக்கேட்பவர்கள் மீது கொலைவெறித் தாக்குதல் நடத்தும் அளவிற்குச் சிறுவர்கள் வன்முறையில் ஈடுபடுவது பெரும் விவாதத்தை ஏற்படுத்தியுள்ளது
