அபுதாபி: 2026 ஆம் ஆண்டு ஐ.பி.எல். ஏலத்தில் (டிசம்பர் 16, 2025) யாரும் எதிர்பாராத வகையில் உத்தரப்பிரதேசத்தைச் சேர்ந்த இளம் ஆல்-ரவுண்டர் பிரசாந்த் வீர்-ஐ (Prashant Veer) ரூ.14.20 கோடிக்குச் சென்னை சூப்பர் கிங்ஸ் (CSK) அணி ஏலத்தில் எடுத்தது. அன்கேப்டு (Uncapped) வீரர் ஒருவருக்கு இவ்வளவு பெரிய தொகையைச் சி.எஸ்.கே. செலவிட்டது பலரையும் வியப்பில் ஆழ்த்திய நிலையில், இது குறித்து அந்த அணியின் தலைமை நிர்வாக அதிகாரி (CEO) காசி விஸ்வநாதன் விளக்கமளித்துள்ளார்.
ஏலத்திற்குப் பிறகு செய்தியாளர்களிடம் பேசிய காசி விஸ்வநாதன், பிரசாந்த் வீரைத் தேர்வு செய்தது தற்செயலான முடிவு அல்ல என்று குறிப்பிட்டார்.
காசி விஸ்வநாதன் கூறியவை: “பிரசாந்த் வீர் எங்களது நீண்ட காலத் திட்டத்தில் இருந்தவர். ரவீந்திர ஜடேஜா போன்ற ஒரு தாக்கத்தை ஏற்படுத்தக்கூடிய இந்திய ஆல்-ரவுண்டரை நாங்கள் தேடிக் கொண்டிருந்தோம். இடது கை சுழற்பந்து வீச்சு மற்றும் அதிரடி பேட்டிங் என இரண்டு துறைகளிலும் பிரசாந்த் மிகச்சிறந்த திறமையைக் கொண்டுள்ளார்.
எங்களின் ஸ்கவுட்டிங் (Scouting) குழு அவரை நீண்ட நாட்களாகக் கவனித்து வந்தது. ஏலப் பட்டியலில் எங்களின் ‘முதல் தேர்வு’ (First Priority) அவர்தான். அதனால்தான் ரூ.14 கோடியைத் தாண்டியும் அவரை வாங்குவதில் உறுதியாக இருந்தோம்.”
ரூ.30 லட்சம் அடிப்படை விலையுடன் ஏலத்திற்கு வந்த பிரசாந்த் வீரை வாங்கச் சன்ரைசர்ஸ் ஹைதராபாத் மற்றும் ராஜஸ்தான் ராயல்ஸ் அணிகள் கடும் போட்டி போட்டன. இறுதியில் ரூ.14.20 கோடிக்கு சி.எஸ்.கே. அவரை வாங்கியது. இதன் மூலம் ஐ.பி.எல். வரலாற்றில் அதிக விலைக்கு வாங்கப்பட்ட அன்கேப்டு வீரர் என்ற சாதனையைப் பிரசாந்த் வீர் படைத்துள்ளார்.
