சென்னை: 2026 சட்டமன்றத் தேர்தலை முன்னிட்டு தமிழக அரசியல் கட்சிகள் கூட்டணிப் பேச்சுவார்த்தையில் தீவிரம் காட்டி வரும் நிலையில், தேமுதிக தனது கூட்டணி நிலைப்பாட்டை முடிவு செய்யப் புதிய வியூகம் ஒன்றை வகுத்துள்ளது.
பிரேமலதாவின் 4 ஆப்ஷன்கள்: தேமுதிக பொதுச்செயலாளர் பிரேமலதா விஜயகாந்த் தலைமையில் இன்று நடைபெற்ற மாவட்ட செயலாளர்கள் கூட்டத்தில், கூட்டணி குறித்து ஒரு ‘ரகசிய வாக்கெடுப்பு’ நடத்தப்பட்டது. அதில் மாவட்ட செயலாளர்களுக்குக் கீழே குறிப்பிட்ட 4 ஆப்ஷன்கள் வழங்கப்பட்டுள்ளன:
-
திமுக கூட்டணி (ஆளுங்கட்சியுடன் கைகோர்ப்பது)
-
அதிமுக கூட்டணி (பழைய கூட்டணியைத் தொடர்வது)
-
தமிழக வெற்றி கழகம் (தவெக) கூட்டணி (நடிகர் விஜய்யுடன் புதிய கூட்டணி)
-
மற்றவை / தனித்துப் போட்டி
முடிவு யாருடையது? கூட்டத்திற்குப் பின் செய்தியாளர்களிடம் பேசிய பிரேமலதா விஜயகாந்த், “மாவட்ட செயலாளர்களின் கருத்தை நான் கேட்டிருக்கிறேன். அவர்கள் எந்தக் கூட்டணியை விரும்புகிறார்களோ, யாருடன் சென்றால் கட்சிக்கு வலு சேர்க்கும் என்று நினைக்கிறார்களோ, அதன் அடிப்படையிலேயே இறுதி முடிவு அமையும். ஜனநாயக முறையில் இந்த முடிவு எடுக்கப்படும்” என்று தெரிவித்தார்.
விஜய் பக்கம் சாய்கிறதா தேமுதிக? அரசியல் வட்டாரங்களில் ஓடும் ரகசியத் தகவலின்படி, தேமுதிக-வின் இரண்டாம் கட்டத் தலைவர்கள் பலர் விஜய்யின் தவெக அல்லது அதிமுக கூட்டணியையே விரும்புவதாகத் தெரிகிறது. குறிப்பாக, “கேப்டன் விஜயகாந்த் மற்றும் விஜய்” இடையேயான பழைய உறவை முன்வைத்து தவெக-வுடன் கூட்டணி வைக்கப் பெரும் ஆர்வம் காட்டப்பட்டு வருகிறதாம்.
மாவட்ட செயலாளர்கள் அளித்துள்ள இந்த ‘சீக்ரெட்’ பேப்பர்களில் என்ன முடிவு வரப்போகிறது என்பதைப் பொறுத்தே தமிழக அரசியலின் அடுத்தடுத்த நகர்வுகள் அமையும்.
