தைலாபுரம்: பாட்டாளி மக்கள் கட்சியின் நிறுவனர் மருத்துவர் ராமதாஸ் தலைமையில் இன்று நடைபெற்ற அவசர ஆலோசனைக் கூட்டத்தில், அவரது மகனும் கட்சியின் தலைவருமான அன்புமணி ராமதாஸ் மீது நிலுவையில் உள்ள ஊழல் வழக்குகளை விரைந்து விசாரிக்கக் கோரி தீர்மானம் நிறைவேற்றப்பட்டுள்ளது. தந்தையே மகனுக்கு எதிராக இத்தகைய முடிவை எடுத்திருப்பது தமிழக அரசியலில் பெரும் நிலநடுக்கத்தை ஏற்படுத்தியுள்ளது.
தைலாபுரம் தோட்டத்தில் நடைபெற்ற இந்தக் கூட்டத்தில், ராமதாஸுக்கு ஆதரவான மூத்த நிர்வாகிகள் மற்றும் மாவட்டச் செயலாளர்கள் பங்கேற்றனர். கூட்டத்தின் முடிவில் பல அதிரடி தீர்மானங்கள் நிறைவேற்றப்பட்டன. அதில் மிக முக்கியமானது:
விரைவு விசாரணை: அன்புமணி ராமதாஸ் மத்திய அமைச்சராக இருந்தபோது தொடரப்பட்ட மருத்துவக் கல்லூரி முறைகேடு தொடர்பான ஊழல் வழக்குகளை, சம்பந்தப்பட்ட புலனாய்வு அமைப்புகள் மற்றும் நீதிமன்றங்கள் விரைந்து விசாரணை நடத்தி முடிக்க வேண்டும் என இக்கூட்டம் வலியுறுத்துகிறது.
ஏற்கனவே “எனது பெயரை அன்புமணி தரப்பினர் பயன்படுத்தக் கூடாது” என ராமதாஸ் தடை விதித்திருந்த நிலையில், இப்போது நேரடியாக ஊழல் வழக்கு விவகாரத்தைக் கையில் எடுத்துள்ளார்.
கூட்டத்தின் சாரம்சம்: “சட்டம் தன் கடமையைச் செய்ய வேண்டும். கட்சிக்கும் கொள்கைக்கும் களங்கம் விளைவிக்கும் வகையில் செயல்படுபவர்கள் யாராக இருந்தாலும், அவர்கள் சட்டத்தின் முன் பதில் சொல்லியே ஆக வேண்டும். குடும்ப உறவை விடக் கட்சியின் கண்ணியமே முக்கியம்,” என ராமதாஸ் தரப்பினர் இக்கூட்டத்தில் முழக்கமிட்டனர்.
இந்தத் தீர்மானம் அன்புமணி ராமதாஸ் தரப்பிற்குப் பெரும் நெருக்கடியைக் கொடுத்துள்ளது. கட்சியின் கட்டுக்கோப்பு சிதைந்துள்ளதையே இது காட்டுவதாக அரசியல் விமர்சகர்கள் கருதுகின்றனர். இந்தத் தீர்மானத்தைத் தொடர்ந்து, அன்புமணியின் தலைவர் பதவிக்கு ஆபத்து ஏற்படலாம் அல்லது கட்சியில் அதிகாரப்பூர்வப் பிளவு ஏற்படலாம் என எதிர்பார்க்கப்படுகிறது.
