ஈரோட்டில் இருந்து சேலம் நோக்கி சுமார் 30 பயணிகளுடன் வந்த அரசுப் பேருந்து, இன்று மதியம் உத்தமசோழபுரம் அருகே கட்டுப்பாட்டை இழந்து கோர விபத்துக்குள்ளானது. பயணத்தின் போது திடீரென பேருந்தின் பிரேக் செயலிழந்ததாக கூறப்படுகிறது. இதனால் ஓட்டுநர் வாகனத்தை கட்டுப்படுத்த முடியாமல் போனதால், எதிர் திசையில் வந்த சரக்கு வாகனத்தின் மீது பேருந்து மோதியது. அதன் தாக்கத்தில் அருகில் சென்றுகொண்டிருந்த இருசக்கர வாகனமும் விபத்தில் சிக்கியது.
இந்த விபத்தில் சரக்கு வாகனத்தில் இருந்த ஒரு குழந்தை உள்ளிட்ட 5 பேர் சம்பவ இடத்திலேயே உயிரிழந்தனர். மேலும், படுகாயமடைந்த சிலர் உடனடியாக அருகிலுள்ள மருத்துவமனைக்கு கொண்டு செல்லப்பட்டனர். அவர்களில் 2 பேர் சிகிச்சை பலனின்றி உயிரிழந்ததால், மொத்த பலி எண்ணிக்கை 8 ஆக உயர்ந்தது. பலர் கடுமையான காயங்களுடன் சிகிச்சை பெற்று வருகின்றனர்.
விபத்தில் சிக்கிய பேருந்தில் இருந்த மற்ற பயணிகள் பெரும்பாலும் லேசான காயங்களுடன் உயிர் தப்பினர். காயமடைந்தவர்கள் அருகிலுள்ள தனியார் மருத்துவமனைகளில் அனுமதிக்கப்பட்டு சிகிச்சை அளிக்கப்பட்டு வருகிறது.
சம்பவம் குறித்து தகவல் அறிந்த கொண்டலாம்பட்டி போலீசார் உடனடியாக சம்பவ இடத்திற்கு விரைந்து வந்து மீட்பு பணிகளில் ஈடுபட்டனர். உயிரிழந்தவர்களின் உடல்கள் மீட்கப்பட்டு, உடற்கூறு ஆய்விற்காக சேலம் அரசு மருத்துவமனைக்கு அனுப்பி வைக்கப்பட்டது.
இந்த விபத்து காரணமாக சேலம்–கோவை தேசிய நெடுஞ்சாலையில் சில மணி நேரங்களுக்கு போக்குவரத்து கடுமையாக பாதிக்கப்பட்டது. விபத்து நடந்த இடத்தில் மக்கள் கூட்டம் கூடிவந்ததால் பரபரப்பு நிலவியது. ஆத்திரமடைந்த பொதுமக்கள் விபத்துக்குக் காரணமான அரசுப் பேருந்தை சேதப்படுத்தியதும் குறிப்பிடத்தக்கது.
மேலும், இந்த விபத்துக்கான சிசிடிவி காட்சிகள் தற்போது சமூக ஊடகங்களில் வேகமாக பரவி, பொதுமக்களிடையே அதிர்ச்சி மற்றும் கவலையை ஏற்படுத்தியுள்ளது.
இந்த சம்பவம் தொடர்பாக கொண்டலாம்பட்டி போலீசார் வழக்குப்பதிவு செய்து, விபத்திற்கான சரியான காரணங்களை கண்டறிய தீவிர விசாரணை மேற்கொண்டு வருகின்றனர்.
