மும்பை: மகளிர் உலகக் கோப்பை அரையிறுதிப் போட்டியில், நடப்புச் சாம்பியன் ஆஸ்திரேலியாவை வீழ்த்தி இந்திய அணி இறுதிப் போட்டிக்குத் தகுதி பெற்றதை அடுத்து, ஆட்டநாயகியாகத் தேர்ந்தெடுக்கப்பட்ட ஜெமிமா ரோட்ரிக்ஸ் ஆனந்தக் கண்ணீருடன் பேசியது அனைவரின் மனதையும் உருகச் செய்தது. கடந்த காலங்களில் தான் எதிர்கொண்ட மனப் போராட்டங்களையும், கடினமான நாட்களையும் நினைவுகூர்ந்து அவர் பேசிய வார்த்தைகள், இந்த வெற்றி ஒரு தனிப்பட்ட சதம் அல்ல, அது ஒரு வீராங்கனையின் மீண்டெழும் கதை என்பதைக் காட்டியது.
இந்த வெற்றிக்கு முதலில் நான் இயேசுவுக்கு நன்றி சொல்ல விரும்புகிறேன். இதை என்னால் தனியாகச் செய்திருக்க முடியாது. இன்று அவர்தான் என்னைத் தாங்கிச் சென்றார் என்பது எனக்குத் தெரியும்” என்று ஜெமிமா உணர்ச்சிவசப்பட்டுப் பேசத் தொடங்கினார்.
கடினமான கடந்த காலங்கள்:
- மனச் சவால்கள்: “கடந்த சில மாதங்கள் மிகவும் கடினமானதாக இருந்தன. கிட்டத்தட்ட இந்தச் சுற்றுப்பயணம் முழுவதும் நான் ஒவ்வொரு நாளும் அழுதுகொண்டே இருந்தேன். நான் மனதளவில் நன்றாக இல்லை. நான் அதிக மன அழுத்தத்துடனும் (Anxiety) இருந்தேன்.”
- அணியில் இருந்து நீக்கப்பட்ட வலி: “கடந்த ஆண்டு நான் உலகக் கோப்பையில் இருந்து நீக்கப்பட்டேன். அந்த வலி இன்றும் மனதில் இருந்தது. ஆனாலும், எல்லாமே நம் கட்டுப்பாட்டில் இருக்காது.”
- பயிற்சியும் ஆதரவும்: “எனது அம்மா, அப்பா, பயிற்சியாளர் மற்றும் என்மீது நம்பிக்கை வைத்த அனைவருக்கும் நன்றி. நான் சோர்வாக இருந்தபோது, எனது அணி வீரர்கள் ஹர்மன்பிரீத், தீப்தி சர்மா, ரிச்சா கோஷ் ஆகியோர் என்னை உற்சாகப்படுத்தினார்கள். அவர்களது ஆதரவு தான் இந்த வெற்றியைச் சாத்தியமாக்கியது.”
இந்தியாவுக்காக விளையாடினேன்:
ஜெமிமா தனது சதம் குறித்தோ, தனிப்பட்ட செயல்பாடு குறித்தோ பெருமை கொள்ளவில்லை. அது இந்திய அணியின் வெற்றி மட்டுமே என்று அழுத்தமாகக் கூறினார்.
“இன்று எனது 50 அல்லது 100 பற்றி அல்ல. இன்று இந்தியாவை வெற்றி பெறச் செய்வது பற்றியது. இதற்கு முன் நாங்கள் முக்கியமான நாக்-அவுட் போட்டிகளில் தோல்வியடைந்திருக்கிறோம். இந்த முறை இறுதி வரை நின்று, இந்தியாவை வெல்ல வைக்க வேண்டும் என்பதே என் ஒரே நோக்கமாக இருந்தது.”
“நான் களத்தில் இருந்தபோது, ஒரு பைபிள் வசனம் என் நினைவில் ஓடிக்கொண்டே இருந்தது: ‘நீ அசையாமல் நில், கடவுள் உனக்காகப் போராடுவார்’. நான் சோர்வடையும்போதெல்லாம் அந்த வசனத்தை மனதில் சொல்லிக் கொண்டே இருந்தேன். உண்மையிலேயே, அவர்தான் எனக்காகப் போராடினார்” என்று கூறி, ஜெமிமா மைதானத்தின் ஆதரவுக்கு நன்றி தெரிவித்தார்.
339 ரன்கள் என்ற இமாலய இலக்கைத் துரத்தும்போது, ஜெமிமாவின் பொறுப்பான மற்றும் அதிரடியான ஆட்டம் தான் வெற்றிக்குத் துருப்புச் சீட்டாக அமைந்தது. 134 பந்துகளில் 127 ரன்கள் குவித்து ஆட்டமிழக்காமல் இருந்து, இந்தியாவை மூன்றாவது முறையாக உலகக் கோப்பை இறுதிப் போட்டிக்கு அழைத்துச் சென்ற ஜெமிமா, தனது பெற்றோரை ஆரத்தழுவி ஆனந்தக் கண்ணீருடன் தனது உணர்ச்சிகளை வெளிப்படுத்தினார்.
