புது டெல்லி: ஈரானில் பொருளாதார நெருக்கடி மற்றும் அரசியல் மாற்றங்களைக் கோரி கடந்த சில வாரங்களாக நடைபெற்று வரும் போராட்டங்கள் தற்போது கட்டுக்கடங்காத வன்முறையாக மாறியுள்ளன. பாதுகாப்புச் சூழல் நாளுக்கு நாள் மோசமடைந்து வருவதால், ஈரானில் உள்ள இந்தியர்களின் நலன் கருதி மத்திய வெளியுறவுத்துறை அமைச்சகம் (MEA) இன்று ஒரு புதிய பயண ஆலோசனையை வெளியிட்டுள்ளது.
உடனடியாக வெளியேறவும்: ஈரானில் தங்கியிருக்கும் இந்திய மாணவர்கள், வணிகர்கள், யாத்ரீகர்கள் மற்றும் சுற்றுலாப் பயணிகள், அங்குக் கிடைக்கும் விமானச் சேவைகளைப் பயன்படுத்தி உடனடியாக வெளியேற வேண்டும் என அறிவுறுத்தப்பட்டுள்ளது.
பயணத் தடை: மறு அறிவிப்பு வரும் வரை இந்தியர்கள் யாரும் ஈரானுக்குப் பயணம் செய்ய வேண்டாம். அவசியமற்ற அனைத்துப் பயணங்களையும் தவிர்க்குமாறு மத்திய அரசு கேட்டுக்கொண்டுள்ளது.
தூதரகப் பதிவு: ஈரானில் தங்கியிருக்கும் இந்தியர்கள் மற்றும் இந்திய வம்சாவளியினர் (PIO) உடனடியாகத் தெஹ்ரானில் உள்ள இந்தியத் தூதரகத்தில் தங்களைப் பதிவு செய்து கொள்ள வேண்டும். இணையத் துண்டிப்பு இருந்தால், இந்தியாவில் உள்ள குடும்பத்தினர் மூலமாகப் பதிவு செய்யலாம்.
ஆவணங்களைத் தயாராக வைத்திருங்கள்: அவசர காலங்களில் வெளியேறுவதற்கு ஏதுவாக கடவுச்சீட்டு (Passport), விசா மற்றும் அடையாள அட்டைகளை எப்போதும் கையில் வைத்திருக்க அறிவுறுத்தப்பட்டுள்ளது.
போராட்டப் பகுதிகளைத் தவிர்க்கவும்: தற்போது போராட்டங்கள் நடைபெறும் இடங்களுக்குச் செல்வதைத் தவிர்க்கவும், உள்ளூர் செய்திகளைத் தொடர்ந்து கவனிக்கவும் வலியுறுத்தப்பட்டுள்ளது.
பின்னணி: ஈரானில் நடந்து வரும் போராட்டங்களை ஒடுக்க அந்நாட்டு ராணுவம் மேற்கொண்டு வரும் நடவடிக்கைகளில் இதுவரை 2,500-க்கும் மேற்பட்ட போராட்டக்காரர்கள் கொல்லப்பட்டதாகத் தகவல்கள் தெரிவிக்கின்றன. மேலும், அமெரிக்கா உள்ளிட்ட நாடுகள் இந்த விவகாரத்தில் தலையிட வாய்ப்புள்ளதால் மத்திய அரசு இந்த முன்னெச்சரிக்கை நடவடிக்கையை எடுத்துள்ளது.
