லார்ட்ஸ்: இங்கிலாந்துக்கு எதிரான மூன்றாவது டெஸ்ட் போட்டியில் இந்திய வேகப்பந்து வீச்சாளர் முகமது சிராஜ்க்கு அபராதம் விதிக்கப்பட்டுள்ளது. நேற்று (ஜூலை 13) லார்ட்ஸ் மைதானத்தில் நடைபெற்ற போட்டியின் மூன்றாவது நாள் ஆட்டத்தில், சிராஜின் நடத்தை ஐசிசியின் விதிமுறைகளை மீறியதாகக் கருதப்பட்டு இந்த நடவடிக்கை எடுக்கப்பட்டுள்ளது.
இங்கிலாந்து அணியின் தொடக்க வீரர் பென் டக்கெட் விக்கெட்டை முகமது சிராஜ் வீழ்த்தியபோது இந்த சம்பவம் நடந்தது. விக்கெட் வீழ்ந்த உற்சாகத்தில் சிராஜ் ஆக்ரோஷமாக கொண்டாடியதுடன், வெளியேறிக் கொண்டிருந்த டக்கெட்டை நோக்கி ஏதோ பேசியதாகவும், அவரது தோள்பட்டை மீது மோதிச் சென்றதாகவும் கூறப்படுகிறது. இந்தச் செயல் ஐசிசியின் வீரர்களின் நடத்தை விதிமுறைகளின் கீழ் லெவல் 1 விதிமீறலாகக் கருதப்படுகிறது.
இந்த விதிமீறலுக்காக முகமது சிராஜ்க்கு போட்டி கட்டணத்தில் இருந்து அபராதம் விதிக்கப்படலாம் என எதிர்பார்க்கப்படுகிறது. ஐசிசியின் விதிகள் படி, லெவல் 1 விதிமீறல்களுக்கு குறைந்தபட்சம் எச்சரிக்கை அல்லது வீரரின் போட்டி கட்டணத்தில் 50% வரை அபராதம் விதிக்கப்படலாம். அத்துடன், சிராஜ்க்கு ‘டிமெரிட்’ புள்ளிகளும் (Demerit Points) வழங்கப்படலாம்.
இந்த சம்பவம் களத்தில் பெரும் பரபரப்பை ஏற்படுத்தியதுடன், நடுவர்களும் தலையிட்டு நிலைமையை சீர் செய்தனர். சிராஜின் இந்த ஆக்ரோஷமான கொண்டாட்டங்கள் ஒருபுறம் ரசிகர்கள் மத்தியில் வரவேற்பைப் பெற்றாலும், மறுபுறம் ஐசிசி விதிமுறைகளுக்கு உட்பட்டு விளையாட வேண்டும் என்ற கோரிக்கையும் எழுந்துள்ளது. போட்டி நடுவர்கள் இந்த விவகாரம் குறித்து முழுமையாக விசாரித்து முடிவை அறிவிப்பார்கள் என எதிர்பார்க்கப்படுகிறது.
