திருவனந்தபுரம்: கேரளாவில் நிபா வைரஸ் பரவல் மீண்டும் அச்சுறுத்தலை ஏற்படுத்தியுள்ளது. பாலக்காடு பகுதியில் மேலும் ஒருவருக்கு நிபா வைரஸ் தொற்று உறுதி செய்யப்பட்டுள்ளது. ஏற்கனவே மலப்புரம் மற்றும் பாலக்காடு மாவட்டங்களில் மூன்று பேருக்கு நிபா வைரஸ் தொற்று கண்டறியப்பட்ட நிலையில், இந்த நான்காவது பாதிப்பு சுகாதாரத்துறைக்கு மேலும் சவாலை ஏற்படுத்தியுள்ளது.
புதிதாகப் பாதிக்கப்பட்ட நபருடன் நெருங்கிய தொடர்பில் இருந்த 675 பேர் தீவிரமாகக் கண்காணிக்கப்பட்டு வருகின்றனர். அவர்களுக்கு ஏதேனும் அறிகுறிகள் தென்படுகின்றனவா என்பது குறித்துக் கண்காணிக்கப்பட்டு, தேவைப்பட்டால் உடனடியாகப் பரிசோதனை மற்றும் சிகிச்சை அளிக்க ஏற்பாடுகள் செய்யப்பட்டுள்ளன.
சுகாதாரத்துறை அமைச்சர், நிபா வைரஸ் பரவலைக் கட்டுப்படுத்தத் தேவையான அனைத்து முன்னெச்சரிக்கை நடவடிக்கைகளையும் எடுத்து வருவதாகத் தெரிவித்துள்ளார். பாதிக்கப்பட்டவர்களின் உடல்நிலை தொடர்ந்து கண்காணிக்கப்பட்டு வருவதாகவும், அவர்களுக்குச் சிறப்பு சிகிச்சை அளிக்கப்பட்டு வருவதாகவும் அறிவிக்கப்பட்டுள்ளது.
பொதுமக்கள் மத்தியில் நிபா வைரஸ் குறித்த விழிப்புணர்வை ஏற்படுத்தி, வௌவால்கள் மற்றும் பன்றிகளுடனான நேரடித் தொடர்பைத் தவிர்க்கவும், பழங்களை நன்கு கழுவி உண்ணவும், கைகளைச் சுத்தமாக வைத்துக்கொள்ளவும் அறிவுறுத்தப்பட்டுள்ளது. நிபா வைரஸ் பாதிப்பு ஏற்பட்ட பகுதிகளில் இருந்து புதிய தகவல்கள் தொடர்ந்து வெளியிடப்படும் என்றும், பொதுமக்கள் பீதியடையத் தேவையில்லை என்றும் சுகாதாரத்துறை கேட்டுக்கொண்டுள்ளது.
