மத்திய கிழக்கு நாடுகளில் நிலவும் போர் பதற்றத்தால், உலக நாடுகளுக்கான எரிபொருள் விநியோகம் பெரும் சவாலாக மாறியுள்ளது. குறிப்பாக, ஈரானின் கட்டுப்பாட்டில் உள்ள ஹார்முஸ் ஜலசந்தி (Strait of Hormuz) வழியாகச் செல்ல எண்ணெய் கப்பல்கள் தயக்கம் காட்டி வரும் நிலையில், அமெரிக்க அதிபர் டொனால்ட் டிரம்ப் ஒரு அதிரடியான அறிவிப்பை வெளியிட்டுள்ளார்.
இது குறித்துப் பேசிய அவர், “எண்ணெய் கப்பல்களைச் செலுத்துவதற்கு எவ்வித அச்சமும் தேவையில்லை. ஹார்முஸ் ஜலசந்தி வழியாகத் துணிச்சலுடன் கப்பல்களைச் செலுத்தலாம். ஈரான் நாட்டின் கடற்படை இப்போது கடலுக்கு அடியில் மூழ்கிவிட்டது, அவர்களால் எவ்வித அச்சுறுத்தலையும் ஏற்படுத்த முடியாது” எனத் தனது பாணியில் அதிரடியாகத் தெரிவித்துள்ளார்.
ஈரானின் கடல்சார் பாதுகாப்பு நடவடிக்கைகள் குறித்து டிரம்ப் இப்படி ஒரு கிண்டலான மற்றும் எச்சரிக்கையான கருத்தைக் கூறியிருப்பது உலக அரங்கில் பரபரப்பை ஏற்படுத்தியுள்ளது. ஹார்முஸ் ஜலசந்தி வழியாகத்தான் உலகின் 20 சதவீதத்திற்கும் அதிகமான கச்சா எண்ணெய் மற்றும் எல்பிஜி (LPG) போக்குவரத்து நடைபெறுகிறது. இந்தப் பாதையில் நிலவும் பதற்றத்தால் இந்தியா உள்ளிட்ட நாடுகளில் எரிபொருள் தட்டுப்பாடு நிலவி வருகிறது.
டிரம்பின் இந்தத் தைரியமான அறிக்கை, உலக நாடுகளின் எரிபொருள் இறக்குமதியை மீண்டும் பழைய நிலைக்குக் கொண்டு வரும் என எதிர்பார்க்கப்படுகிறது. மேலும், அமெரிக்கக் கடற்படை இந்தப் பாதையில் உள்ள கப்பல்களுக்குப் பாதுகாப்பு அளிக்கும் என்பதையும் அவர் மறைமுகமாகச் சுட்டிக்காட்டியுள்ளார். டிரம்பின் இந்தப் பேச்சுக்குப் பிறகு, சர்வதேசச் சந்தையில் கச்சா எண்ணெய் விலை குறையுமா அல்லது ஈரான் இதற்குப் பதிலடி கொடுக்குமா என்ற எதிர்பார்ப்பு எழுந்துள்ளது. எது எப்படியோ, “அச்சம் வேண்டாம்” என டிரம்ப் கொடுத்த இந்த உத்தரவாதம், உலகப் பொருளாதாரத்திற்கு ஒரு சிறிய ஊக்கத்தை அளித்துள்ளது.
