மலப்புரம் மாவட்டத்தில் கொண்டோட்டி பகுதியில் நடந்த சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. கொண்டோட்டியைச் சேர்ந்த ஒரு கல்லூரி மாணவி, சில தினங்களுக்கு முன்பு தன்னிடம் அறியாமல் வந்த ஒரு இன்ஸ்டாகிராம் மெசேஜ் மூலம் பெரும் அதிர்ச்சியில் ஆழ்ந்தார். அந்த மெசேஜில் அவரது மார்பிங் செய்து மாற்றிய ஆபாச புகைப்படங்கள் சேர்க்கப்பட்டிருந்தன. முதலில் அதைக் கண்டதும் மாணவி பீதி அடைந்தார். ஆனால் படங்களை ஆராய்ந்தபோது அது போலி புகைப்படம் என்பதும், யாரோ தனக்கு பழி ஏற்படுத்த திட்டமிடுகிறார்கள் என்பதும் தெரியவந்தது. இதை அவர்கள் இன்ஸ்டாகிராமில் பரப்பாமல் இருக்க ரூ.5 லட்சம் பணம் தர வேண்டும் என்று மிரட்டும் செய்தி பின்னர் வந்தது. இதனால் மனமுடைந்து போன மாணவி உடனடியாக கொண்டோட்டி போலீஸ் நிலையத்தில் புகார் அளித்தார். போலீசாரும் விசாரணையை தீவிரமாகத் தொடங்கினர். ஆனால் மிரட்டல் விடுத்தவர்கள் மாணவியை விடவில்லை. தொடர்ந்து இன்ஸ்டாவில் மெசேஜ் அனுப்பி பணம் தருமாறு அழுத்தம் கொடுத்தனர். பணம் தர முடியாத நிலைக்கு சென்ற மாணவி, அந்த பணத்திற்கு பதிலாக தன் பவுன் செயினை கொடுத்து விட முடிவு செய்தார். ஆனால் இந்த தகவலும் போலீசுக்கு கிடைத்தது. மாணவியை பாதுகாப்பாக கண்காணித்து வந்த போலீசார், அவர் செயினை கொடுத்து செல்லும் இடத்திற்கு முன்பே தயார் நிலையில் இருந்தனர்.
அந்த நேரத்தில் மாணவியிடம் செயினை வாங்க வந்த முகம்மது தஷ்ரீப் (21) என்பவரை போலீசார் கையும் களவுமாக கைது செய்தனர். அவருடன் தொடர்பில் இருந்த முகம்மது நிதாஸ் (21) மற்றும் முகம்மது ஷான் (22) ஆகிய இருவரும் பின்னர் கைது செய்யப்பட்டனர். விசாரணையில் தஷ்ரீப் மாணவியுடன் பள்ளி நாட்களில் பழகியவர் என்றும் அந்த பழக்கத்தை தான் இப்போது தவறான நோக்கத்தில் பயன்படுத்தி பணம் பறிக்க திட்டமிட்டதாகவும் தெரிய வந்தது. மூவரும் தற்போது மலப்புரம் நீதிமன்றத்தில் ஆஜர்படுத்தப்பட்டு நீதிமன்ற உத்தரவின்படி சிறையில் அடைக்கப்பட்டுள்ளனர். மாணவி போலீசாரின் சாமர்த்தியத்தால் மிகப்பெரிய சிக்கலிலிருந்து தப்பியுள்ளார். மேலும், இவ்வாறு போலி புகைப்படங்கள் மூலம் மிரட்டும் சம்பவங்கள் அதிகரித்து வரும் நிலையில் பெற்றோர்கள் மற்றும் மாணவிகள் மிகவும் விழிப்புடன் இருக்க வேண்டும் என்றும் போலீசார் கேட்டுக்கொண்டுள்ளனர்.
