கோயம்புத்தூர் மாவட்டம் பூண்டி அருகே உள்ள வெள்ளியங்கிரி மலை, ‘தென்னகத்து கைலாயம்’ என்று பக்தர்களால் போற்றப்படுகிறது. மார்ச் மற்றும் ஏப்ரல் மாதங்களில் நிலவும் சீசன் காரணமாக லட்சக்கணக்கான பக்தர்கள் ஏழு மலைகளைக் கடந்து சுயம்பு லிங்கத்தைத் தரிசிக்கச் செல்வது வழக்கம்.
இந்த நிலையில், கோயம்புத்தூர் கெம்பட்டி பகுதியைச் சேர்ந்த ஹரிதாஸ் (வயது 45) என்பவர் இன்று அதிகாலை வெள்ளியங்கிரி மலையேற்றத்தின் போது திடீரென உயிரிழந்த சம்பவம் பெரும் சோகத்தை ஏற்படுத்தியுள்ளது. மலையேறத் தொடங்கிய சில மணி நேரங்களிலேயே அவருக்கு மூச்சுத்திணறல் மற்றும் உடல்நலக் குறைவு ஏற்பட்டதாகக் கூறப்படுகிறது. சக பக்தர்கள் மற்றும் வனத்துறையினர் அவரை மீட்க முயன்றும் பலனின்றி அவர் உயிரிழந்தார்.
குறிப்பிடத்தக்க விஷயம் என்னவென்றால், நடப்பு 2026-ம் ஆண்டு சீசன் தொடங்கிய சில நாட்களிலேயே வெள்ளியங்கிரி மலையில் ஏற்படும் 3-வது உயிரிழப்பு இதுவாகும். செங்குத்தான மலைப்பாதை மற்றும் உயரத்தில் நிலவும் ஆக்சிஜன் குறைபாடு காரணமாக இதயப் பாதிப்பு மற்றும் மூச்சுத்திணறல் ஏற்பட்டு பக்தர்கள் உயிரிழப்பது தொடர்கதையாகி வருகிறது.
முன்னதாக இரண்டு பேர் இதேபோல் உயிரிழந்த நிலையில், தற்போது ஹரிதாஸின் மரணம் பக்தர்களிடையே அச்சத்தை ஏற்படுத்தியுள்ளது. போதிய உடல் தகுதி இல்லாதவர்கள் மற்றும் இதயம் தொடர்பான பாதிப்பு உள்ளவர்கள் மலையேறுவதைத் தவிர்க்க வேண்டும் என்று வனத்துறையினர் தொடர்ந்து எச்சரிக்கை விடுத்து வருகின்றனர். இந்தத் தொடர் உயிரிழப்புகளைத் தடுக்க மருத்துவக் குழுவினரை மலையிலேயே பணியமர்த்த வேண்டும் என்ற கோரிக்கையும் வலுத்து வருகிறது.
