தமிழ்நாடு அரசின் சிறப்புத் திட்டமாகும் ‘கலைஞர் மகளிர் உரிமைத் தொகை திட்டம்’, தற்போது மேலும் பலருக்கு பயன்படும் வகையில் விரிவாக்கம் செய்யப்பட்டுள்ளது. முதலில், குடும்பத்தலைவிக்கு மாதம் ரூ.1,000 வழங்கும் திட்டமாக இது தொடங்கப்பட்டது. தற்போது, குடும்பத் தலைவி இல்லாத சூழ்நிலையில், 21 வயது கடந்த பெண் உறுப்பினருக்கும் இந்த தொகை வழங்கப்படும் என அதிகாரப்பூர்வமாக அரசு அறிவித்துள்ளது. ஒரு குடும்பத்தில் தாயார் இறந்துவிட்டதாக வைத்துக்கொள்வோம். அப்பா மற்றும் இரண்டு மகள்கள் உள்ள நிலையில், மூத்த மகள் 21 வயதைக் கடந்திருந்தால், அவர் தான் அந்த குடும்பத்தின் பெண் தலைமை எனக் கருதப்படும். இதனால், அவர் திட்டத்திற்கு தகுதியானவராக மாறுகிறார். இதுபோல், ஏற்கனவே முறைப்படி விண்ணப்பித்தும் நிராகரிக்கப்பட்டவர்கள், வட்டாச்சியர் அலுவலகம் அல்லது நெருக்கமான தாலுகா அலுவலகத்தில் மீண்டும் விண்ணப்பிக்கலாம் என அரசு அறிவுறுத்தியுள்ளது. தனியாக வாழும் விவாகரத்து பெற்ற பெண்களுக்கு இத்திட்டம் ஒரு நிதி ஆதரவாக அமைந்துள்ளது. தனிநபர் ரேஷன் அட்டை வைத்திருப்பது முக்கியமான தகுதி ஆகும். இது இருந்தால், அவர்களும் மகளிர் உரிமைத் தொகையை பெற முடியும்.
குடும்பங்களில் குடும்பத்தலைவி இல்லாத சூழ்நிலைகளிலும் பெண்கள் புறக்கணிக்கப்படாமல் பாதுகாக்கப்பட வேண்டும் என்ற சமூக நியாயக் கோணமும் இதில் அடங்கியுள்ளது. முதலில், தங்களது ரேஷன் அட்டை மற்றும் ஆதார் கார்டு போன்ற அடையாள ஆவணங்களை தயார் செய்ய வேண்டும். பின்னர், வட்டாச்சியர் அலுவலகம், ஊராட்சி மன்றம், நகராட்சி அலுவலகம் போன்ற இடங்களில் நேரில் சென்று விண்ணப்பிக்கலாம். இணையதள மூலமாக விண்ணப்பிக்க விரும்புவோர், தமிழ்நாடு அரசு மகளிர் நலத்துறை இணையதளத்தில் கூட விண்ணப்பிக்கலாம் (சமீபத்தில் இது செயல்பாட்டில் உள்ளதா என்பதைக் சரிபார்க்க வேண்டும்). இந்த திட்டம், குடும்ப தலைவி என்ற ஒரே வரம்புக்குள் நின்று பெண்கள் புறக்கணிக்கப்படக் கூடாது என்பதைக் கட்டாயமாக வலியுறுத்தும் ஒரு சமூகப் புரட்சியை ஏற்படுத்தியுள்ளது.
